'സെറ്റ്' (സ്റ്റേറ്റ് എലിജിബിലിറ്റി ടെസ്റ്റ്); രജിസ്ട്രേഷൻ ഡിസംബർ 10 വരെ നീട്ടി
സെറ്റ് പരീക്ഷയ്ക്കുള്ള അപേക്ഷ തീയതി നീട്ടി. ഹയർ സെക്കണ്ടറി, നോൺ വൊക്കേഷണൽ അധ്യാപക നിയമനത്തിനുള്ള സംസ്ഥാനതല യോഗ്യത നിർണയ പരീക്ഷയായ 'സെറ്റ്' (സ്റ്റേറ്റ് എലിജിബിലിറ്റി ടെസ്റ്റ്) ന് ഓൺലൈൻ അപേക്ഷ ഡിസംബർ 10 ലേക്കാണ് നീട്ടിയത്. ഓൺലൈൻ രജിസ്ട്രേഷൻ നടത്തിയ വിവരങ്ങൾ തിരുത്താനുള്ള അവസരം ഡിസംബർ 11, 12, 13 തീയതികളിലാണ്.
പരീക്ഷ
31 വിഷയങ്ങളിലാണ് ഇത്തവണ പരീക്ഷയുള്ളത്. സർക്കാർ സ്വയംഭരണ സ്ഥാപനമായ എൽ.ബി.എസ് സെന്റർ ഫോർ സയൻസ് & ടെക്‌നോളജിക്കാണ് പരീക്ഷാ ചുമതല.
അപേക്ഷാ യോഗ്യത
ബിരുദാനന്തര ബിരുദ പരീക്ഷയിൽ 50 ശതമാനത്തിൽ കുറയാതെ മാർക്ക് അല്ലെങ്കിൽ തത്തുല്യ ഗ്രേഡും (പട്ടിക/ ഭിന്നശേഷി വിഭാഗക്കാർക്ക് അഞ്ച് ശതമാനം ഇളവുണ്ട്) ബി.എഡുമാണ് അടിസ്ഥാന യോഗ്യത. മാത്തമാറ്റിക്‌സ്, ഫിസിക്‌സ്, കെമിസ്ട്രി, ബോട്ടണി, സുവോളജി വിഷയങ്ങളിൽ റീജിണൽ ഇൻസ്റ്റിറ്റ്യൂട്ട് ഓഫ് എജ്യുക്കേഷനിലെ (RIE) എം.എസ്.സിഎഡ് പ്രോഗ്രാം 50 ശതമാനം മാർക്കോടെ ജയിച്ചവർക്കും അപേക്ഷിക്കാം. ഏതെങ്കിലും ആർ.ഐ.ഇയിൽനിന്ന് 50 ശതമാനം മാർക്കോടെ ലൈഫ് സയൻസിൽ എം.എസ്.സി എഡ് യോഗ്യത നേടിയവർക്കും ബോട്ടണി, സുവോളജി വിഷയങ്ങൾക്ക് അപേക്ഷിക്കാം.
50 ശതമാനമെങ്കിലും മാർക്കോടെ കമ്മ്യൂണിക്കേറ്റീവ് ഇംഗ്ലിഷിൽ എം. എയും ബി.എഡുമുള്ളവർക്ക് ഇംഗ്ലിഷിൽ സെറ്റിന് അപേക്ഷിക്കാൻ അർഹതയുണ്ട്. എന്നാൽ ആന്ത്രപ്പോളജി, കൊമേഴ്‌സ്, ഗാന്ധിയൻസ്റ്റഡീസ്, ജിയോളജി, ഹോം സയൻസ്, ജേണലിസം, മ്യൂസിക്, ഫിലോസഫി, സൈക്കോളജി, സോഷ്യൽ വർക്ക്, സോഷ്യോളജി, സ്റ്റാറ്റിസ്റ്റിക്‌സ് വിഷയങ്ങളിൽ ബിരുദാനന്തര ബിരുദംനേടിയ വിദ്യാർഥികൾക്ക് ബി.എഡ് ബിരുദം നിർബന്ധമല്ല.
അറബിക്, ഉർദു, ഹിന്ദി വിഷയങ്ങളിൽ DLED, LTTC തുടങ്ങിയ ട്രെയിനിങ് കോഴ്‌സുകൾ വിജയിച്ചവർക്കും ബി.എഡ് കൂടാതെ സെറ്റിന് അപേക്ഷിക്കാവുന്നതാണ്. നാച്വറൽ സയൻസിൽ ബി.എഡും 50 ശതമാനം മാർക്കോടെ ബയോടെക്‌നോളജി എം.എസ്.സിയുമുള്ളവർക്ക് ബയോടെക്‌നോളജിയിൽ സെറ്റ് എഴുതാം.
അടിസ്ഥാന യോഗ്യതയിൽ ഒന്നുമാത്രം നേടിയവർക്ക് ചില നിബന്ധനകൾ പ്രകാരം സെറ്റ് പരീക്ഷയെഴുതാം. ബിരുദാനന്തര ബിരുദം മാത്രം നേടിയവർ ബി.എഡ് കോഴ്‌സിന്റെ അവസാന വർഷം പഠിക്കുന്നവരായിരിക്കണം. അവസാന വർഷ ബിരുദാനന്തര ബിരുദക്കാർക്ക് ബി.എഡ് ഉണ്ടെങ്കിൽ മാത്രമേ സെറ്റിന് അപേക്ഷിക്കാൻ സാധിക്കുകയുള്ളൂ. ഇത്തരം നിബന്ധനകളോടെ സെറ്റ് പരീക്ഷ എഴുതുന്നവർ അവരുടെ ബിരുദാനന്തര ബിരുദം/ബി.എഡ് പരീക്ഷയുടെ നിശ്ചിത യോഗ്യത, സെറ്റ് പരീക്ഷയുടെ ഫലം പ്രഖ്യാപിക്കുന്ന തീയതി മുതൽ ഒരു വർഷത്തിനകം നേടിയിരിക്കണം. അല്ലാത്തപക്ഷം അവരെ ഈ ചാൻസിൽ സെറ്റ് പരീക്ഷ ജയിച്ചതായി പരിഗണിക്കുന്നതല്ല.
രണ്ട് പേപ്പറുകൾ
ഒ.എം.ആർ അധിഷ്ഠിത പരീക്ഷയിൽ രണ്ട് മണിക്കൂർ വീതം ദൈർഘ്യമുള്ള രണ്ട് പേപ്പറുകളാണുള്ളത്. ഒബ്ജക്റ്റീവ് രീതിയിലുള്ള ചോദ്യങ്ങൾ. പൊതുവായ ഒന്നാമത്തെ പേപ്പറിൽ പൊതു വിജ്ഞാനം, അധ്യാപന അഭിരുചി എന്നിവ പരിശോധിക്കുന്ന ചോദ്യങ്ങൾ. ഓരോ മാർക്ക് വീതമുള്ള 120 ചോദ്യങ്ങൾ. രണ്ടാമത്തെ പേപ്പറിൽ പി.ജി തലത്തിൽ സ്‌പെഷലൈസ് ചെയ്ത വിഷയത്തെ ആസ്പദമാക്കിയുള്ള ചോദ്യങ്ങളുണ്ടാകും. ഒരു മാർക്ക് വീതമുള്ള 120 ചോദ്യങ്ങൾ. എന്നാൽ മാത്തമാറ്റിക്‌സ്, സ്റ്റാറ്റിസ്റ്റിക്‌സ് വിഷയങ്ങൾക്ക് 1.5 മാർക്ക് വീതമുള്ള 80 ചോദ്യങ്ങളുണ്ടാകും. തെറ്റുത്തരത്തിന് നെഗറ്റീവ് മാർക്കില്ല. എല്ലാ ജില്ലകളിലും പരീക്ഷാകേന്ദ്രങ്ങളുണ്ടാകും.
48% മാർക്ക്
സെറ്റ് യോഗ്യത ലഭിക്കാൻ ജനറൽ വിഭാഗത്തിന് ഓരോ പേപ്പറിലും 40 ശതമാനം വീതവും രണ്ട് പേപ്പറിലും ചേർത്ത് 48 ശതമാനവും മാർക്ക് ലഭിച്ചിരിക്കണം. പിന്നോക്ക വിഭാഗക്കാർക്ക് ഇത് യഥാക്രമം 35 , 45 ശതമാനവും പട്ടിക /ഭിന്നശേഷി വിഭാഗങ്ങൾക്ക് യഥാക്രമം 35, 40 ശതമാനവും ലഭിച്ചാൽ മതി.